ភ្នំពេញ៖ នាយករដ្ឋមន្ត្រីនៃព្រះរាជាណាចក្រកម្ពុជា សម្ដេចតេជោ ហ៊ុន សែន បានទទួលជួបពិភាក្សាការងារជាមួយនាយករដ្ឋមន្ត្រីនៃសាធារណរដ្ឋឡាវលោក ផនខាំ វីផាវ៉ាន់ នារសៀលនេះក្នុងពេលដែលលោកធ្វើទស្សនកិច្ចផ្លូវរដ្ឋមកព្រះរាជាណាចក្រកម្ពុជា។
យោងតាមសេចក្ដីប្រកាសព័ត៌មានរបស់ក្រសួងការបរទេសឱ្យដឹងថា សម្ដេចតេជោ ហ៊ុន សែន និងលោក ផនខាំ វីផាវ៉ាន់ នឹងប្រជុំពិភាក្សាលើទំនាក់ទំនង និងកិច្ចសហប្រតិបត្តិការទ្វេរភាគី រួមទាំងការស្ដារសង្គម-សេដ្ឋកិច្ចឡើងវិញក្រោយវិបត្តិនៃជំងឺកូវីដ-១៩ បញ្ហាតំបន់ និងអន្តរជាតិនានា ដែលជាចំណាប់អារម្មណ៍និងក្ដីបារម្ភរួម។
ចុងបញ្ចប់នៃជំនួបក៏មានការធ្វើសន្និសីទកាសែតរួមមួយ ដែលបង្ហាញលទ្ធផលនៃការជួបប្រជុំនេះផងដែរ។
បើតាមក្រសួងការបរទេស ដំណើរទស្សនកិច្ចផ្លូវការរបស់លោក ផនខាំ វីផាវ៉ាន់ នៅកម្ពុជាក្នុងអំឡុងពេលដែលកម្ពុជាកំពុងបើកប្រទេសឡើងវិញ នឹងរួមចំណែកក្នុងការបន្តពង្រឹងបន្ថែមទៀតនូវចំណងមិត្តភាពជាប្រពៃណីដ៏យូរអង្វែង សាមគ្គីភាពជាភាតរភាព ភាពជាអ្នកជិតខាងល្អ ដៃគូយុទ្ធសាស្រ្ត គ្រប់ជ្រុងជ្រោយនិងយូរអង្វែង និងកិច្ចសហប្រតិបត្តិការដ៏ជិតស្និទ្ធរវាងប្រទេសទាំងពីរ ក៏ដូចជាជំរុញកិច្ចសហប្រតិបត្តិការនៅក្នុងក្របខ័ណ្ឌអាស៊ានដើម្បីសន្តិភាព ស្ថិរភាព និងវិបុលភាពនៅក្នុងតំបន់ និងពិភពលោក។
លោកផនខាំ វីផាវ៉ាន់ បានមកដល់ប្រទេសកម្ពុជាកាលពីម៉ោងប្រមាណ១១ថ្ងៃទី២៩ ខែវិច្ឆិកានេះ ក្នុងដំណើរទស្សនកិច្ចផ្លូវរដ្ឋចំនួនពីរថ្ងៃនៅកម្ពុជាគឺនៅថ្ងៃទី២៩ និង៣០ ខែវិច្ឆិកា ឆ្នាំ២០២១៕
